O audiovisual na educación actual

Como vemos, o uso do vídeo na aula cunha vertente educativa non é cousa recente, e partindo disto, podemos ver que posibilidades ofrece na actualidade o audiovisual e que premisas debe cumprir.

Poderiamos dicir que un audiovisual educativo é un medio didáctico elaborado cun deseño e pedagoxía meditada, que “serve para facilitar ao profesorado ou o instructor a transmisión de coñecemento e ao alumnado a asimilación do mesmo”. Os vídeos educativos deben cumprir un obxectivo didáctico claro e marcado de inicio, máxime se se participa no seu proceso de creación. Convídote a ollar este pequeno vídeo sobre a potencialidade do audiovisual en educación. 

Na actualidade os vídeos educativos convertéronse nunha parte importante da educación, sendo unha ferramenta para transmitir contido curricular na aula e na casa durante o proceso de ensino-aprendizaxe, en clases invertidas (flipped classroom ), combinada (blended clasroom) ,  on- line, de repaso… 

Para conseguir un uso efectivo do mesmo, débense consideran tres elementos: 

• como administrar a carga cognitiva do vídeo
• como maximizar a motivación dos estudantes co vídeo
• como promover a aprendizaxe activa a partir do vídeo.

Chegados a este punto habería que diferenzar o emprego de audiovisuais como medio que contén os contidos de aprendizaxe (Ex. unha vídeo lección) e o uso da mesma produción dun audiovisual como vía para adquisición e desenvolvemento de coñecementos e competencias polo alumnado e supervisado polo profesor (Ex. creación dun noticieiro ou dunha curta en equipo na aula). Estes casos podemos velos nos vídeos seguintes:  

Se falamos do audiovisual como medio no que se transmiten os novos coñecementos en forma de vídeo lección como é o caso do vídeo de arriba XeoClip, visualizar vídeos, aínda que inicialmente pode parecer pasivo, implica alta actividade cognitiva que é necesaria para a aprendizaxe activa: “as mensaxes instructivas multimedia ben deseñadas poden promover o procesamento cognitivo activo nos estudantes, mesmo cando os estudantes parecen estar inactivos no comportamento”

Vantaxes

Pódense citar unha serie de puntos interesantes polos cales o vídeo educativo sería interesante empregalo na aula:

• Permite unha mellor adaptación para o alumnado con necesidades específicas, como pode ser o alumnado xordo, engadindo subtítulos ou engadindo o traballo de  signado dun intérprete.
• Permite que o alumnado aprenda ao seu propio ritmo. O vídeo pódese parar e repetir cantas veces se queira (completo ou fragmentos), atendendo ás necesidades individuais de cadaquén. 
• Permite salvar períodos longos de ausencia escolar debido a enfermidades graves ou hospitalizacións e/ou recuperar os días que o alumnado non estivese especialmente atento.
• Proporciona unha mellor adaptación ás diferentes preferencias de aprendizaxe.
• Reforza a lectura e a compresión do material didáctico.
• Mellora a autonomía, comprensión e a discusión dos/das estudantes.
• Proporciona unha aprendizaxe a través de varias canles: canle visual / pictórica e  outra canle de procesamento  auditivo / verbal.
• Aumenta a motivación  e entusiasmo do estudantado. 
• Promove a efectividade do profesorado, pois xera clases maxistrais moi preparadas e meditadas (no caso de vídeo leccións elaboradas polo mesmo).
• Permite unha relación 1:1 entre formador ou docente e o alumno.
• Grazas as plataformas como YouTube ou Vimeo a visualización do material pode ser ubicua e portable grazas aos dispostitivos móbiles.